Павлодарда сәбиге сәтсіз «сүндеттеу» (циркумцизия) отасын жасаған хирургқа қатысты қылмыстық іс қаралды.

«Павлодар қаласы бойынша қылмыстық істер жөніндегі мамандандырылған ауданаралық сотында медицина қызметкерінің кәсіби міндетін тиісінше орындамауына байланысты А.-ға қатысты (ҚР ҚК 317-бабының 2-бөлігі) қылмыстық іс қаралды», – делінген жұма күні соттың баспасөз қызметі таратқан хабарламада.

2023 жылғы 23 тамызда хирург А. сүндеттеу отасын жасау барысында абайсызда баланың денсаулығына ауыр зиян келтірген.

Айыптаушы прокурор А.-ны бір жылға бас бостандығынан айыруды сұрады. Ал жәбірленуші баланың заңды өкілі мен өкілі барынша қатаң жаза тағайындауды талап етті.

А. өз кінәсін мойындамай, ақтауды сұрады.

Сот шешімімен А.-ға бір жылға бостандығын шектеу жазасы тағайындалып, пробациялық бақылау орнатылды, бірқатар міндеттер жүктеліп, мәжбүрлі еңбекке тарту қарастырылды.

Сондай-ақ, А. бір жыл мерзімге хирург ретінде медициналық қызмет көрсету құқығынан айырылды.