Алматы облысында 1 млн. түп ағаш отырғызылады
11.03.2021
Қоғам
4
Жетісу жерінде алдағы 5 жылда 1 миллион түп ағаш егу көзделген. Оның 200 мыңы биыл егілмек.
Бұл туралы Алматы облысы әкімінің бірінші орынбасары Лаззат ТҰРЛАШОВТЫҢ қатысуымен өткен жиында айтылды, деп хабарлайды «Arasha.kz» ақпараттық-құқықтық сайты жергілікті дереккөздерге сүйене отырып.
Бұған Президенттің «бос жерлерді жасыл алқапқа айналдырамыз» деген тапсырмасы себеп болып отыр.
Осыған байланысты өткен жиында арнайы тапсырманың аудан-ауылдардағы орындалу барысы да пысықталды.
«Неге мына мүлдем жұмыс жасамай жатқандар тапсырманы орындамайды? Ағаштың да жоспарын беріңдер. Кімге қанша ағаш отырғызуға берді. Қай аудан жоспарды бізге жеткізді?..»
Бұл – облыс әкімінің бірінші орынбасарының жұмысы сылбыр аудан әкімдеріне көңілі толмағандағы сұраулы «пәрмені».
Лаззат Тұрлашовтың аудан әкімдеріне қарата: «жоспарын беріңдер» деп бұлай бірден талап айтуының да өзі себебі бар. Өйткені алдын ала келісілген үлкен межені жүзеге асыруда салмақ елді мекендерге де түспек.
Дәлірек айтқанда, бес жылда шып-шырғасыз 1 миллион ағаш егу үшін әр ауылда 10-20 гектар алқапқа орман отырғызу көзделген.
Осылайша, күні кешегі Қызылағаштағы қызылкеңірдек жер дауынан бастап, жердің мәселесі әркімнің «бас ауыруына» айналуға шақ тұрған облыста тағы бір тың жобаның «қиқуы» басталды да кетті.
Ұқсас жаңалықтар.
Бөлісу:
